Erditzerako prestatzea

Erditzea prozesu fisiologikoa da eta hortaz, haurdun dagoen emakume oro (gaixotasun edo arriskuzko egoera batean ez badago) da erditzeko gai.

Erditzerako prestatzeko erarik eraginkorrena infomazioa izatea da eta norberaren beldur eta zalantzak aurrez argitzea.

ERDITZERAKO PRESTAKUNTZA NORBERARENGAN:

  1. Zeure burua eta gorputzarengan, zeure erditzeko gaitasunean konfidantza izan.
  2. Erditzearen inguruko informazioa jaso. Gertatuko dena ulertu.
  3. Zeure eskubideak ezagutu.
  4. Zer nahi duzun eta zer ez duzun nahi erabaki.
  5. Erditzea artatzeko era desberdinen inguruko informazioa bilatu.
  6. Artatuko zaituen profesionala edo ospitalea aukeratu.
  7. Ez izan zeure iritzia adierazteko beldurrik, erditzean zeu zara protagonista.
  8. Zurekin egongo den/diren pertsonak ondo aukeratu.
  9. Erditze ostean eskertu edo erreklamazioa jarri zerbitzua hobe dezaten.
  10. Zeure esperientzia ingurukoekin partekatu.

Erditzerako prestakuntza on batek honako baldintzak bete behar lituzke:

– Erditze fisiologikoaren inguruko informazioa eskaintzen da, medikuen esku hartzea soilik kasu justifikatuetan ematen dela azalduz.

– Gerta litezken esku hartzeen arrazoiak, onurak eta albo ondorioak argi azaltzen dira.

– Erabaki guztiak hartzeko egin beharra duen bakarra haurdun dagoen emakumearena dela azpimarratzen da.

– Zure galdera eta zalantzak argitzen dizkizute. Zure nahiak errespetatzen dira eta ez zara epaitua sentitzen.

Informazio eguneratua izatea, zure gorputzean eta buruan konfidantza izatea eta beldur eta zalantzak aurrez argitzeak erditzeko unera prestaturik iristen lagunduko dizu, eta hortaz, erditzean arazoak egoteko aukerak gutxituko dira.

Lasaitzen eta ondo sentitzen laguntzen dizun edozein ariketa (neurrian eginik) egokia da gorputza zein emozionalki ondo egoten laguntzeko. Yoga, igeriketa, oinez ibiltzea eta haurdun dauden bikoteentzat antolaturiko beste zenbait ikastarok, haurdunaldiari denbora eskaintzeko balioko dute, hobeto sentitzeko eta egoera berdinean dauden beste bikote zenbaitekin zalantzak partekatzeko.

Oso garrantzitsua da erditzearen inguruan beldurra zerk ematen dizun identifikatu eta beldur horiek haurdunaldian lantzea. Erditzea ondo joatea eragotzi dezaken arlo oso boteretsua da burua, eta beldur horiek erditzeko unean blokeoak sortzeko gai izaten dira.

Normalean, minari edo arazoren bat egoteari izaten zaio beldurra:

– Erditze fisiologiko batean, amak nahi duen jarrera hartu, lasaitasunez eta giro erosoan dagoen bitartean, esku hartze minimoa edo bat ere ez dagoen bitartean, mina ez da gehiegizkoa izango. Minaren inguruko beldurra, azken belaunaldien erditzeen medikalizazio gehiegizkoaren ondorioz sortu da, ama deseroso dagoen jarreretan, etengabeko esku hartzea… dagoenean edo erditzea artifizialki azkartu nahi denean, mina asko areagotzen da eta.

Arazoren bat egoteari beldurra izatea normala da baina haurdunaldi osoan bezala, oso garrantzitsua da lasaitasuna mantentzea. Ahalik eta esku hartzerik txikiena egotea gomendatzen da, baina beti, erditzea emagin baten presentzian gerta dadin saiatuaz, arazorik balego, emaginak gai baitira arazoa azkar identifikatu eta konponbiderik egokiena azkar bilatzen.

ERDITZERAKO PRESTAKUNTZAREN GAKOAK:

– Erditzera doanak ez du arnasa hartzeko modu berezirik ikasi behar. Erlaxazio teknikak erabiltzea, arnasketa sakonak… ondo etorriko da erditzeko unean lasaitasuna mantendu eta mina hobeto kudeatzeko. Dena den, erditzeko unean garrantzitsua dena ez da arnasa era berezi batean hartzen ikastea, ARNASA HARTZEA baizik.

Sarri, beldurra edo minak arnasa une batez ez hartzera eramaten gaitu, eta horrek minaren sentsazioa areagotzeaz gain, haurrari iristen zaion oxigenoa gutxitzen du bestelako arazoak sor ditzakelarik. Erditzeko unean, arnasa hartu, nahi duzun edo behar duzun eran, baina geratu gabe.

Perinearen prestakuntza: emakumearen perinea erditzeko prestaturik dago, hortaz, ez luke prestakuntza berezirik behar izango. Dena den, haurdunaldia une egokia da perine masajea maiz egiteko eta perinea eta garunaren inguruko konexioa indartzeko. Perinea oso elastikoa da eta masajeen bidez, elastikotasun horren kontzientzia berreskuratuko da.

Masaje mota hau 22 astetik aurrera egiten hastea gomendatzen da, oso progresiboki, minik hartu gabe eta egunean bi aldiz eginik olioren baten laguntzaz.

Ez dago masaje mota honen onura erabatekoa adierazten duen ebidentzia nahikorik, baina emakumeak bere gorputza ezagutzeko eta beldurra galtzeko erabilgarria izan daiteke.

Erditzean lagunduko dizun pertsonarekin, bikotea, doula, laguna edo familiakoa izan, zer espero duzun, zer nahi duzun eta zer ez duzun nahi hitz egin. Arazo edo zailtasun zehatzik egongo balitz, nola jokatzea nahiko zenuken zehaztu eta erditze plana idatzi.

Mugimendua garrantzitsua da erditzean, espezializaturiko fisioterapeuta batekin prestakuntza egiteak lagun diezazuke zure gorputza ezagutzen.

Hemen topatuko duzun informazioa orokorra da eta ez du ordezkatzen osasun zerbitzuetatik zure egoerarekiko jasorikoa. Zalantzarik baduzu, egizu kontsulta dagokion profesionalarekin.

× Zalantzarik?