Mina arintzeko teknika ez inbasiboak

Erditzea minarekin burutzen den zerbait dela eta sufritu behar dugula irakatsi digun gizartean bizi gara. Horrek, erditzeko uneari beldurra izatea sor dezake eta beldur hori izango da erditzean agertu eta mina sorraraziko diguna. Beldurrak, tentsioan egotea sortzen du, eta umetokia tentsioan izateak, ez dio bere lana behar bezala egiten uzten eta mina agertzen da.

Hala ere, minak ez du sufritzea esan nahi. Uzkurdurek mina eman arren, bestelako faktoreek eragiten ez badute, min hori uzkurdurek irauten duten bitartean soilik sentituko da, eramangarria izango da eta uzkurduren artean atseden hartu eta deskonektatzen utziko du.

Mina areagotzen duten egoerak:

Deseoroso egotea. Nahi den jarrera ezin hartu izatea, etzanda egotera beharturik egotea, argi gehiegi egon eta ezin itzaltzea, egarria izan eta edaten ez uztea, kable edo tutuek nahi bezala mugitzen ez uztea, hotza edo beroa izatea…

Oxitozina sintetikoa erabiltzea.

Segurtasunik eta intimitaterik ez sentitzea.

ZER EGIN MINA ARINTZEKO?

– Uneoro emakumeak nahi duen jarrera hartzea, mugimendu askatasuna. Erditzearen une bakoitzean, gorputzak jarrera desberdinak hartzea eskatzen du. Oinez noraezean ibiltzea, dantza egitea, zintzilikatzea, pilateseko pilota eserita, lau hanketan, kuxinek, igerilekuan…

Dutxa edo bainu beroak. Batez ere dilatazio fasean eraginkorrak dira, beroa giltzurrunetan sentitzeak uzkurdurak arindu ditzake.

Masajea. Erditzeko unean lagunduko digun pertsonak, oinarrizko masajeak ematen aurrez ikasteak asko lagun dezake, bizkarrean, oinetan zein lepoaldean masajeak jasotzeak lasaitzen lagunduko du.

Musika lasaigarria, kandelak, aromaterapia… giro atsegin eta lasaia sortzeak asko laguntzen du.

Manta elektrikoa, hazizko kuxinak… bero lokalizatuak asko arintzen du uzkurduren mina, batez ere giltzurrunetan sentitzen diren uzkurdurak badira.

Hipnosia, biofeedbacka… teknika hauek oso eraginkorrak izaten dira, baina soilik egiten dakienak burutu behar ditu.

Abestea edo soinuak askatzea. Abestea edo barnetik ateratzen diren soinuak askatzeak mina arindu eta prozesua errazten du. Ahoa eta umetokiaren artean lotura dagoela dioten teoriak daude, eta ahoa zabaltzeak eta hotsak askatzeak umetokia dilatatzen laguntzen duela.

Meditazioa, yoga... lasaitasuna areagotu eta gorputzari lanean uzteko metodo hauek eraginkorrak izaten dira mina arintzeko.

Erditzeko mina arintzeko erarik onena emakumea errespetatzea da. Lasaitasuna mantendu, emakumeak behar duen intimitatea eta segurtasuna sentitzeak minaren sentsazioa gutxitu eta sufrimendurik ez egotea ekarriko du.

[2018ko maiatzean eguneratua]

Hemen topatuko duzun informazioa orokorra da eta ez du ordezkatzen osasun zerbitzuetatik zure egoerarekiko jasorikoa. Zalantzarik baduzu, egizu kontsulta dagokion profesionalarekin.

× Zalantzarik?