Zesarearen arriskuak

Zesarea ebakuntza handia da eta hortaz, soilik benetan beharrezkoa denean egin behar da.

Hauek dira zesareak AMARENTZAT dituen arriskuak:

– Ama hiltzeko arriskua erditze baginalean baino 4-6 aldiz altuagoa da. Hortaz, ez da zesarearik egin behar benetan beharrezkoa ez bada.

Zesarean hiltzeko arrazoia zesarearen beraren konplikazioren bat edo anestesiarekin arazoren bat egotea izan ohi da. Larrienak, odol galera handiak izatea (batzuetan umetokia kentzea beharrezkoa delarik odol galera beste eraren batean geratzerik ez dagoelako). Tronbosi edo enboliak (odol koaguluak sortu eta beste organuetara joateak sorturiko arazoak). Ez dira ohiko arazoak, baina heriotza arriskua sortzen dute.

Anemia arriskua. Odol galerak erditzean baina handiagoak izan ohi dira eta horrek anemia sor dezake. Odol-transfusioak behar izatea eragiten du edo hilabeteetan zehar ahultasunarekin bizi behar izatea.

Infekzioetarako arriskua. Umetokia, maskuria edo ebakuntzak eragindako zauri inguruan infekzioak sor daitezke.

Peritoniti arriskua areagotzen da, istripuz maskuria edo hesteak moztu daitezke ebakuntzan (umetokiaren alboan dauden organuak dira eta).

Ileo paralitikoa edo hesteak gelditzea. Ebakuntzaren ostean hesteen mugimendua geratu edo ez ohikoa izatea gerta daiteke. Guztiz geratzen bada, arazo larria sortzen da. Mugimendua aldatzen bada, bizi guztirako beherako edo idorreria garaiak sor daitezke.

Atxikidurak sortzea. Organu desberdinen artean, zuntzak sortu eta euren egoera normala alda dezakete. Sarri atxikidurak ez dira nabaritzen eta ez dute ondorio garrantzitsurik sortzen. Hala ere, asko dira, ebakuntzatik hilabete batzuetara, edo zenbait urtera, sabelaldea puzturik, idorreria, beherakoa eta halako sintomak egunero izaten dituztenak. Zenbaitetan, zesareatik hainbat urtera, atxikidurek hesteak guztiz oztopatzea gerta daiteke.

Ugalkortasun arazoak. Atxikidurak falopioren tronpetan edo umetokiaren toki zehatzen batean ematen badira beste haurdunaldi bat lortzea zail daiteke, edo ezinezko bihurtu. Haurdunaldia lortuta ere, bat-bateko abortua izateko aukera asko igotzen da. Plazentaren arazoak ere izateko arriskua asko areagotzen da.

Haurra galtzea. Aurrez zesarea izan duten emakumeek, haurdunaldiaren azken fasean haurra galtzeko aukera bikoitza dute.

Hileroko mingarri eta galera handikoak. Zesarea ostean, nahiko maiz gertatzen da hilerokoak mina sortzea eta odol kopuru handia galtzea (horrek aldi berean, anemia sortzen duelarik).

Anestesiak efektu nahikorik ez egitea. Zenbait kasutan anestesiak nahiko efekturik izan ez eta ebakuntza sentitzeko arriskua dago. Horrelako kasuetan, Trauma Osteko Estresa eta beste zenbait trauma sortzen dira.

– Errakideoko anestesia erabiltzen den kasuetan buruko min handia izateko arriskua dago.

– Anestesiari alergia edo shocka sortzea oso larria da (oso gutxitan ematen da).

Ondorio emozional eta psikologiko handiak ditu zesareak. Erditzeosteko depresioa eta Trauma Osteko Estresa oso ohikoak dira. Ikus hemen gehiago..

Hauek dira HAURRARENTZAT zesareak dituen arriskuak:

Erditze kanaletik pasatzeak haurrak egoera optimoan munduratzeko beharrezkoak dituen zenbait prozesu mesedegarri ditu: birikak likidoz hustuarazten ditu, garuna eta hesteak kanpoko mundurako prestatzen ditu… Zesareaz jaiotzen diren haurrek, ez dute hau guztia jasotzeko aukerarik, horregatik, zesarea, beharrezko den kasuetan soilik egin behar da.

Arnas arazoak: birikek hustutzea eta mundurako prestatzea jaso ez duten haurrek, arnasa azkarregi eta superfizialki hartzeko arrisku handiagoa dute. Horrek oxigeno beharra eragingo die eta hortaz, zaintza berezietako eremuan egon beharko du. Arazo hau ohikoagoa da zesarea programatuko kasuetan, haurrek uzkurduren bidez mundurako prestatzea izan ez dutelako.

Goizegi jaiotzeko arriskua. Erditzea 37-42 asteen artean ematen da normalean, haur bakoitzaren arabera 38. astean jaiotzea egokia izan daiteke, baina beste zenbait 42.astera arte ez dira prest egongo. Hortaz, goiztiarra izateak sortzen dituen arazoak izan ditzake: organuak ez prest egotea, arnasa hartu edo jateko gaitasunik eza, pisu gutxiegi.. .Arazo hau ohikoagoa da zesarea programatuko kasuetan, haurrek ez dutelako jaiotzeko unea hautatzen, ez dira prest daudenean jaiotzen.

Haurrak ebakia izateko arriskua. Uste dena baina ohikoagoa da, zesareaz jaiotako haurrak ebakiren batekin jaiotzea. Zesarea kasuen %2an ematen da.

Alergiak eta asma izateko arrisku handiago dute zesareaz jaiotako haurrek. Erditze kanaletik jaio ez, eta lehen mikrobioak amarenak ez izatea dira arrazoi nagusiak.

Garapen arazoak. Haurraren garuna jaiotzeko prest ez egoteak ikasteko gaitasun gutxiago edo motelagoa izatea sortzen du. Hau ohikoagoa da zesarea programatu kasuetan.

Hortaz, zesarea, benetan beharrezkoa den kasuetan SOILIK egitea gomendatzen da. Zesarea izateko arriskua asko areagotzen da erditzearen fisiologia naturala eta emakumea errespetatzen ez badira. Mugimendu askatasuna, intimitatea bermatu eta oxitozina sintetikoa, boltsa haustea… bezalako praktikak ekiditeak zesarea tasa gutxituko du.

Zesarearen inguruko guztia “¿Nacer por cesárea? (Ibone Olza, Enrique Lebrero)” liburuan topatuko duzu. Guztiz gomendagarria haurdunaldian irakurri eta zesarea ekiditeko, edo zesarea ostean, zauri emozionala sendatzen laguntzeko.

Zure haurra zesareaz jaio behar dela esan badizute, edo zesareaz jaio bada, El Parto Es Nuestro elkarteak duen Apoyocesareas posta zerrendan laguntza, informazioa eta babesa topatuko dituzu (gazteleraz).

[2018ko maiatzean eguneratua]

Hemen topatuko duzun informazioa orokorra da eta ez du ordezkatzen osasun zerbitzuetatik zure egoerarekiko jasorikoa. Zalantzarik baduzu, egizu kontsulta dagokion profesionalarekin.

× Zalantzarik?